Nje cope e vogel letre….Tolloni !!!!

Tolloni me të cilin ushqeheshin familjet shqiptare në komunizëm

Kjo copë e vogël letre ka qenë për 10 vjet rresht “ushqimi” i përjavshëm i shqiptarëve: gjëja më e rëndësishme në kuzhinën e tyre të varfër.

Në vitin 1981, si pasojë e paaftësisë për të furnizuar tregun me ushqimet e nevojshme, Qeveria komuniste aplikoi një skemë racionimi, që e kishte provuar edhe pas luftës me triskat.

Skema quhej “Tolloni”. Ajo ishte një copë letër që të lejonte çdo javë, në ditën e caktuar të merrje furnizimin me mish, sallam dhe gjalpë.

Tolloni ishte një për familje, pavarësisht se sa e madhe dhe nga sa pjesëtarë përbëhej familja.

Çdo familje merrte një herë në javë mish sipas kësaj skeme:

-Javën e parë të muajit një kilogram mish derri i ngrirë dhe dy pako gjalpë nga 100 gramë secila.

-Javën e dytë, gjysmë kilogrami mish të grirë dhe gjysmë kilogrami sallam, plus dy pakot 100 gramëshe me gjalpë.

-Javën e tretë një pulë e ngrirë hungareze, thuajse një kilogram, plus dy pakot e gjalpit.

-Javën e fundit, në varësi të mundësive, përsëritej një nga tri zgjedhjet e mësipërme.

Tollonat jepeshin në këshillin e lagjes dhe ishin me vulë.
Tolloni nuk tjetërsohej, nuk i jepej dot dikujt tjetër dhe nëse të humbiste nuk zëvendësohej. Tolloni doli nga përdorimi në vitin 1991

Nga Mësuese Mirela, Ese 2016